നാല് മാസത്തെ വിവാഹ മഹോത്സവത്തിന് ഇന്ന് കൊടിയിറക്കം; അംബാനിയുടെ മകൻ അനന്ത് രാധികയുടെ കഴുത്തിൽ മിന്നണിയുന്നത് ഇന്ന്

നാല് മാസം നീണ്ടുനിന്ന ആഘോഷങ്ങൾക്കൊടുവിൽ റിലയൻസ് ഇൻഡസ്ട്രീസ് മേധാവി മുകേഷ് അംബാനിയുടെയും നിത അംബാനിയുടെയും ഇളയ മകൻ അനന്ത് അംബാനിയുടെയും രാധിക മർച്ചന്റിന്റെയും വിവാഹം ഇന്ന്. മുംബൈയിലെ ജിയോ വേൾഡ് സെന്ററിൽ വെച്ചാണ് ചടങ്ങ്.

യുകെ മുൻ പ്രധാനമന്ത്രിമാരായ ബോറിസ് ജോൺസൺ, ടോണി ബ്ലെയർ, കാനഡ മുൻ പ്രധാനമന്ത്രി സ്റ്റീഫൻ ഹാർപർ തുടങ്ങി ഒട്ടേറെ പ്രമുഖരാണ് എത്തുന്നത്. അതിഥികളുമായി നൂറിലേറെ സ്വകാര്യ വിമാനങ്ങൾ മുംബൈയിലെത്തും.

നാളെയാണ് വിരുന്ന് സംഘടിപ്പിച്ചിരിക്കുന്നത്. ശുഭ് ആശിർവാദ് ദിനത്തിലെ വിരുന്നിൽ കേന്ദ്രമന്ത്രിമാരും വിവിധ സംസ്ഥാനങ്ങളിലെ മുഖ്യമന്ത്രിമാരും പങ്കെടുക്കും. നാളെ മുംബൈയിൽ വിവിധ പരിപാടികൾക്കായെത്തുന്ന പ്രധാനമന്ത്രി നരേന്ദ്ര മോദിയും ചടങ്ങിൽ പങ്കെടുത്തേക്കും.

മറ്റന്നാൾ മംഗൾ ഉത്സവ് ദിനത്തിൽ ബോളിവുഡ് താരനിര അണിനിരക്കും. പതിനഞ്ചിന് റിലയൻസ് ജീവനക്കാർക്കായും വിരുന്നൊരുക്കിയിട്ടുണ്ട്.

വ്യവസായി വിരേൻ മർച്ചൻ്റിൻ്റെയും ഷൈല മർച്ചന്റിന്റെയും മകളാണ് രാധിക.